حكم وامثال سودانيه

من طرف **mansour** الأربعاء يناير 18, 2012 6:31 pm

حكم وامثال سودانيه

اكيد كلنا بنسمع من امهاتنا وابواتنا الكتير من الاقوال والامثال السودانيه وكتير من الاوقات ما بنفهم معناها
اها الليله احنا عايزين نعرف بعض الحكم والامثال السودانيه ونشوفها بتتقال لى شنو واى واحد سمع ليهو بى مثل او حكمه يشاركنا بيها
اها نبدا
شوكت الشقى فى الكبده تتلقى
ودى بتتقال لى الزول الحظو كعب ودايما بلقى العوارض فى طريقو
التسوى كريت فى القرض تلقاهو فى جلدها
وكريت للما بعرفها هى الغنمايه
والمعنى انو الغنمايه لما تاكل من شجرة القرض وتتضرها الضرر ده بتلقاهو فى
دباغه جلدها بى القرض وده بتقال لى الزول البيعمل ليه حاجه مضره ويجيه
الجذاء من نفس نوع العمل
جارك القريب ولا ود امك البعيد
وده بتقال لى التاكيد على اهميه الجار الوصانا عليه الرسول صلى الله عليه وسلم
التسوى بى ايدك يغلب اجاويدك
اها وده بتقال لى الزول الشليق البسوى ليهو حاجه ويحتار ما يعرف يحلها او يمرق منها كيف
اب سنينه يضحك على اب سنينتين
وده بيتقال لى الزول العندو عيوب كتيره وبيضحك على زول عيوبو اقل منو
جنا الفار حفار
وده للولد البيشبه ابوهو فى افعالو
اها انا لى هنا اقيف وامشى وجيكم بى امثال واقوال تانيه وخلونا كدى النسال جدو ضمره وحبوبه ام عمار وعمو خالد عن امثال وحكم تانيه

__________________
لو تعلق قلب احدكم بالثريا لنالها